تلخيص حوار باسم يوسف في برنامج امريكي بخصوص القضية الفلسطينية -Bassem Youssef in talk TV
 |
| تلخيص حوار باسم يوسف في برنامج امريكي بخصوص القضية الفلسطينية -Bassem Youssef in talk TV |
1- كلامة الي ابتدى بشكل ساخر كانت اول سلاح قدر باسم يستغلة بشكل صحيح عشان يوضح بشكل كبير ان الي بيحصل دة مش نزاع بين بلدين و لكنها ابادة لبشر بشكل واضح و صريح تحديدا لما هزر و اتكلم على مراتة.
2- باسم موقعش في فخ انه يهاجم المحاور نفسة و بعدها بيرس مورجان يقولة دة برنامجي و انا الي اسأل الاسئلة و تخل في دوامة.
3- استخدامة الساخر لجملة You are one of the good ones خلى بيرس مورجان متلخبط جدا, لأن الطابع الغربي المبني على الفردية بيخليهم دايما في موقف دفاعي عن نفسهم كأفراد حتى لو الموضوع مش عليهم. اول ما تقولة لأ مش بتكلم عليك انت شخصيا بيحس ان اعصابة هديت حتى لو هو مدرك ان الكلام عليه. لكن مجرد انه بيرس مورجان اتشالت المسؤولية عن نفسة اعتبرها مكسب.
4- استخدام باسم لفكرة انك فاكرينهم سوبرمان و لكن في الحقيقة هما هوملاندر (قصة بطل خارق شرير) فيها استخدام سهل و واضح للPop culture الغربي.
5- الورقة الصغيرة المطبوعة الي باسم مسكها فيها visualization للخسائر على الطرفين في اخر عشر سنين خلت بيرس عاجز عن استخدام الجملة التعبانة "من حق الكيان يدافع عن نفسة"
6- لما اتكلم عن بين شابيرو (افتح اعرف دة مين) قال ببساطة دة واحد من اذكى الناس في العالم و دي فيها نظرة سخرية و في نفس الوقت عايز يقول انه بين شابيرو مش واحد غبي و يقصد بشكل كامل تبرير الدمار الي بيحصل دلوقت.
7- باسم متسحبش للخناقة الدينية و العرقية زي اغلب المحاورين العرب, لكن دخل على طول في فكرة انها ازمة انسانية و متسحبش للرغي عن التاريخ و الجغرافيا لأن المتابع الغربي عموما مش بيهتم بالتفاصيل.
8- لما قال اعتبرني ببعت رسالة كمواطن للكيان لرئيس الوزراء بتاعنا كانت ضربة حلوة لأثبات فشل حكومة الكيان لحل مصايبها الداخلية و بتستخدم الوضع الحالي للحشد و الوقوف جمبها. وضح فيها انه فاهم كويس دماغ الطرف الاخر.
9- قدر يكسر بشكل كبير المبرر الخايب بتاع "اصل احنا بنهاجم حم. ا.ٍس" لما اتكلم عن الضفة الغربية و الي بيحصل فيها. دي لوحدها خلت بيرس مورجان عاجز عن الرد و حتى الضيف الي جابة معرفش يرد.
10- صورة البيت المتدمر في اخر المقابلة كانت مقصودة, عشان يقولة بشكل واضح اني شخص عادي جدا و اهلي ناس عاديين و لكن بيتنا اتدمر بحجة ان بيتم استخدام المدنيين كدروع بس الناس مش دروع, في الحقيقة الناس هي الي بقت الاهداف. على العموم نبقى نستخدم البيت في الهالوين.
.
رغم ان باسم يوسف كان باين انه متعصب و ماسك اعصابة بالعافية و لكن حقيقي قدر يجاوب على اسئلة الشعوب الغربية دايما بتسألها رغم انها بالنسبة للعرب مجرد بديهيات.
.
تركيبة الحوار نفسها انه باسم كان عندة 5 نقاط محتاج يتكلم فيهم و النقاط دي الاعلام الغربي بيرددها زي البغبغان بقالهم عشر ايام و هو في محادثة واحدة قدر يثبت نقطتين:
1- الاعلامي الغربي مهما بلغ من خبرة لسة جاهل و مش فاهم الازمة اصلا.
2- مشكلتنا كعرب في الاعلام اننا بنتكلم بطريقتنا احنا (حتى لو بالانجليزي) و دي بيخلي اي حد غربي بيسمعلك شايف حد بيزعق و الغربي مش فاهم اصلا انت بتزعق ليه.
رابط الحلقة مترجمة