مفاتيح السعادة الزوجية

مفاتيح السعادة الزوجية - Marital happiness

لو زوجك طبيعة شغله طول النهار بيلف علي رجله أو واقف أو معظم يومه مبيقعدش يبقي احتياجه حاجة تسحب من رجله الوجع ..

متبخليش عليه بطبق فيه ماية دافية وشوية شاور علي حبة ملح وتسيبي رجله حبة في الطبق ده و بعدين تدلكيهم لأجل تهوني عليه .. من باب حسن التبعل و الإحسان و الحُب لله.

لو زوجك طبيعة شغله طول النهار قاعد أو حركته قليلة يبقي ده إحتياجه مساچ لضهره يهون عليه كلبشة ضهره في الكرسي طول اليوم ..

لو زوجك بينسي نفسه في الشغل ومش بياكل أو مفيش وقت يرفه علي نفسه اعملي له البيت فندق فيه خدمة خمس نجوم ..

شوفيه بيحب إيه و راضيه بيه..

كوباية عصير جوافة باللبن والموز ترطب علي قلبه شقي النهار و تعبه ..

كوباية أعشاب تروق معدته و قولونه

طبق بسبوسة بالمكسرات يحلي دنيته و ينسيه مرارة يومه

طبق كريم كراميل بالفواكه و المكسرات يغسل أحزانه !

متبخليش عليه بـ ٣ ساعات راحة في بيته قبل ما ينام و ينزل في مطحنة الحياة تاني !

زوجك بيحب الشاي ؟

وماله ، كل شوية تسأليه تحب تشرب شاي يا عيني دلوقتي ؟

زوجك بيحب ينام ؟

هيأي البيت عشان يعرف يفصل من صداع اليوم شوية ..

زوجك بيحب الكيك و المخبوزات المنزلية ؟

اتعلمي ومثلا يوم إجازته أملي بيتك ريحة مخبوزات و عجين

مرة قُرص طرية

مرة كحك فطار

مرة كيك بالبرتقال

مرة بسكوت خفيف

انتي كده كده تزوجتيه عشان تتعبدي لله بـ ارضائه يبقي إيه معطلك ؟

الحياة الزوجية مش خروجات و صور علي السوشيال ميديا و مفاجئات رهيبة و سفريات في كل بلد شكل لأ

الزواج استقرار

احتواء و رحمة ..

النهاردة انت هتعذرني عشان تعبانة و مغسلتش الغسيل أو البيت متروقش أو محضرتش أكل .. و بكرا أنا هزق معاك آخر الشهر عشان نعديه باللي معانا .. وأهي بتمشي ..

الحياة الزوجية تكاملية مش ندية لأ ، قايمة علي التجاوز و التغافل و الرحمة أكتر من التصادم و العتاب الكتير .. من الرحمة أنك ترحمي زوجك لله ..

انتي مش عارفة هو بيستحمل إيه برا عشان يوميته اللي بتتراوح من ٨٠ لـ ١٨٠ في المتوسط، بيتحمل تحكمات و رخامة و قلة قيمة عشان القرش اللي هيستركم كل شهر ..

بيتغافل عن بهدلة مديره اللي ممكن اصغر منه عشان مضطر ودي لقمة العيش

مستحمل دوشة الشارع و صراع الجنيه الحلال ..

بيسابق الزمن عشان يوفر طلبات بيته رغم أن الجنيه قيمته بتقل كل ساعة مش بس كل يوم ..

لو أنتي في مطحنة البيت جوا مع المطلوب منك و العيال، فـ هو في مطحنة الشارع برا مع بشر بطباع و اخلاق مختلفة و بيضطر يستحمل عشان يدخل عليكِ آخر اليوم بكيس فاكهة ولا يقدر يديكِ فلوس تجيبي طلباتك ..

فـ نرحم و نساعد بعض المركب تمشي، كده كده هنموت فـ نستثمر عمرنا في صناعة الحسنات وغرس العمل الصالح اللي لما أحصده في الآخرة يكسبني و ادخل بيه الجنة مندمش أن شاء الله.

الله يفهمنا و يعلمنا ويجعلنا زوجات صالحات ويرزقنا حسن التبعل بمدده يارب.