معلومات مهمة عن كل ما يحتاجه حديث الولادة

معلومات مهمة عن كل ما يحتاجه حديث الولادة - Newborn

١. مترَضّعيش صناعى.

٢. حطّى ابنك على الثدى أول ما يتولد ، لو نايم صحيه ، الحلمه ف الفم ، السرسوب هينزل واحده واحده ،لبنك منزلش ؟ نزل ومش كتير ؟؟ اشربي ٣ لتر سوايل ، زورى استشارية رضاعة طبيعية ،،، ،،لأ متديش أعشاب ، ولا صناعى ، ولا جلوكوز..!

٣. مترضعيش صناعى إلا لو لا قدر الله في إيدز أو سُلّ نشط ، علاج كيماوى معين ، أو دوا مضطره تمشي عليه ولازم ينزل في اللبن ويضر البيبي، فيروس هربس على الحلمة، أو دكتور ثقة نصحك لأسباب طبية معتبره ..!

٤. ابنك بيمغّص ؟ بيزنّ؟ بيعيط ؟ مش بينيمك ؟ عنده انتفاخات وكمان ب"يقشط"؟

كرعتيه مرتين وسط وبعد الرضعه؟ نيمتيه على ضهره عادى عشان النوم عالبطن خطر ؟ منعتى أى سجاير حواليه ؟ شيلتيه على كتفك مرفوع قائم ٩٠ درجة ربع ساعه بعد الرضعه ؟ رضعتيه رضعات صغيره تكرار كتير بدل رضعات " كبييرة " مرات قليلة ؟ اتأكدتى ان الحلمة "بالكامل" جوا "بؤه" ومش بيرضع "هَوَا" يملا بطنه؟؟

عملتى كل ده ولسه بيرجّع جامد ويبكى حوالين الرضعه ؟

ساعتها نفكر في عدم تحمل لبن بقرى ،، والدكتور اللى يشخص مش حضرتك..!

٥. منأڤورش في تشخيص حساسية اللبن

٦. متديش كالسيوم ولا ڤيتامينات عالفاضي.!

٧. #من_غير_روشتة..!

ادى ڤي دروب من أول يوم ٤ نقط ، حديد من الشهر السادس ٧ ملجم ، وكملى بيهم لسن سنتين ،،، لأ مش محتاجين كالسيوم أصلاً ألا فى حالات نادرة ،، أمال لبنك بيعمل إيه

٨. التسنين مش محتاج كالسيوم زياده ..!

٩. التسنين مبيرفعش الحرارة بشكل مستمر مزمن ، ولا بيعمل إسهال ولا ترجيع متكرر ،، ولا هوا السبب في الرشح بتاع ابنك ،، ولا هوا اللى رفع سعر الدولار

١٠. جدول لإدخال الأكل :

الأسبوع التانى من الشهر الخامس (١٧ أسبوع) ،، نبدأ بالرزّ ، مسلوق مهروس كويس متخفف في اللبن (الثدى أو الصناعى) ،، كمية صغيرة ( ٣-٥ معالق ) ،، كمان ممكن ندّى الذرة ، القمح ،، بنفس الطريقة ،،

نكمل كده لغاية ٦ شهور ،، بعد كده ،، البطاطس ، البطاطا ، الجزر ، الكوسه ،، ونعمل منهم شوربة خضار مهروسه كويس ،، الفواكه زى الموز، التفاح ، المشمش ، الكمثرى ،، بتدخل بعد الخضار،، نخلى بالنا عشان طعمها مسكّر فالطفل يرفض الخضروات ،،بعد كده على الشهر التامن ندخل الفراخ ، اللحمه ، السمك ،، متقطع "نثاير" ومهروس كويس واحده واحده لغاية العاشر ،،

ناخد بالنا كل نوع أكل يدخل لوحده ١-٣ أيام عشان لو فيه تحسسّ او "تقيل" على الطفل .

١١. منتجات الألبان (الزبادى والجبنة) بتدخل من الرابع للسادس ب#شروط..:

*#تحت اشراف الطبيب الخاص.

*#عدم وجود اكزيما مزمنة او اعراض او شكّ فى حساسية لبن.

*#بعد ادخال الخضروات و"تقبّل" الطفل للأكل أصلاً.

ولأ ،، مبتجيبش سُكّر أطفال ،، ولا حساسية ..!

١٢. ابنك اللى مبياكلش متغصبيش عليه ..!

١٣. إبنك اللى مبياكلش أحياناً بنكون إحنا السبب على فكره ،، مش عودتيه ع الكاندى وشيبسي وبيبسي وكيندر؟ ،، مش مدخلتيش الأكل بدرى واتأخرتى لبعد السنة؟ مش كل ما تجربى أكله جديده و"يتفّها" بتزهقى ؟-لازم تجربي كتير - ،، مش نسيتى تدى الحديد فجاله أنيميا وفقدان شهيه؟؟!!

١٤. بنتك اللى مش بتاكل ،، وكل اما تاكل ترجّع ووزنها ضايع ،، ومش عندها أمراض متكررة واضحة ،، دى محتاجه كشف محترم ، مينفعلوش سؤال عالفيس أو كشف طيارى ،، أمراض "مختفية" زى القلب والكلى والجهاز الهضمى والأعصاب مسئولة ،، مننساش حساسيات الطعام مش دايماً بتبقى السبب وبتتشخص زيادة بشدّة..!

١٥. #ابنك_سِخن ،،؟

خففتى الهدوم ، وقلعتيه ؟ حمّيتيه ؟ فتحتى الشبابيك وهويتي البيت ؟ لسه سخن ؟ اديتي سيتال من عمر يوم ، و بروفين من السادس بوصف طبيب ، لسه سخن ؟؟ صبرتى يومين طالما معنديش علامات خطورة ولا دايخ ولا فى أعراض تانية زى ترجيع إسهال كحة أو تغير وعى ؟ مش قادره عشان الحرارة بتعلى كل ٤ ساعات ؟ انزلى اكشفى فوراٌ !

١٦. #ابنك_سخن؟؟

٩٠٪ أسباب ڤيروسية مش محتاجه مضاد حيوى ،، مننساش التهاب الحلق المشهور(هربس وكوكساكى وفيروسات تانيه ) وعلاجه مش مضاد برضه ..

١٧. مننساش المفاتيح دي لازم نكشف لو لاقيناها مينفعش نصبر :

#حرارة +

*حيل(غدد) ورفض أكل وصديد >> التهاب حلق غالبا

*ألم جانب البطن ووجع اثناء التبول> التهاب بول غالبا

*ألم في الأذن وزنّ ووجع مع الضغط> التهاب اذن غالبا

*برد ورشح أصفر وحرارة> ٣٩ >> جيوب انفيه غالبا

*ترجيع وألم بطن دورى متكرر> حمى بحر ابيض متوسط غالبا

*إسهال ورائحة سيئة >> نزلة معوية غالبا

*كحة ونهجان صدر >> التهاب رئوى.! غالباً

نكشف والطبيب يحدد

١٨. مش مقبول يبقى الأنف سايبه على طول ..!

١٩. لو النوز سايبه دايماً ، أو مسدوده دايماً ، أو في هرش ، خنفره ، شخير ، عطس ، كحة ليلية بشكل مزمن مع صوت"ابتلاع بلغم"..

التشخيص غالباً #حساسية_أنف..!

٢٠. (٨٨٪) من حالات حساسية الصدر اكتشفوا ان سببها أصلاً افرازات (خلف-الأنف) وانها بتتحسن تماما على بخاخات الكوتيزون للأنف.!

٢١. علاج حساسية الأنف فى أطفال مبيقفش وأطفال بيقف لو الأعراض اتحسنت الفيصل المتابعة مع طبيبك.!

٢٢. حساسية الأنف يعنى طفل أنفه حساسه ل"مُثير معين " قدامك حل من اتنين ،، يا نبعد عن المُثير(تراب ، عتة فراش، دخان ، حبوب لقاح) ،، مع إعطاء المسكنات (بخاخات الكورتيزون بالأنف بوصف طبيب ) ،، يا نحدد المثير ونعالج بالأمصال ..

#خلصانه_بشياكة..!

٢٣. طفلك اللى بيكحّ ، وبينهج ، وصدره"بيزيق" ،، بشكل متكرر ،، دي حساسية صدر غالباً والعلاج مش شرب ولا لبوس ولا إبر ،، العلاج بخاخات وجلسات ونظام عالمى GINA Asthma .!

٢٤. معقولة لسه معرفواش ان أسباب الكحة من الصدر نفسه (حساسية ، التهاب رئوى ) يا حاجة "نازلة" على الصدر (بلغم من حساسية الأنف) ، يا حاجة طالعه للصدر (ارتجاع من المرئ) ،، يا حاجة ضاغطة على الصدر ( أورام وأكياس ولاديه) ،، يا حاجة ملهاش علاقة بالصدر(مشاكل الحلق والقصبة الهوائية والحنجره).. يا أمراض جواالصدر نفسه ( زى التكيس الليفى وأمراض ولادية ) يا نقص مناعه عام وده معاه نقص وزن والتهابات تانية غالبا

٢٥. أعطنى بخاخ أنف وبخاخ صدر وهواء نظيف وسأقضى لك على نصف أسباب الكحة في العالم.

٢٦. مش كل ترجيع أنتينال !

٢٧. الترجيع(القئ) ممكن يكون زيادة رضاعه او أكل ، اندفاع لبن فيشرق ، إلتهاب ڤيروسي(برد) في المعده ، جزء من نزلة معوية(لو معاه إسهال محترم) ، بلغم نازل من الانف على جدار المعده(التهاب جيوب انفيه)،التهاب مخ (بينطُر للأمام غالباً مع تغير الوعى) ،، ارتجاع رضع عادى ، حساسية طعام أحياناً ، أو أمراض جراحية انسدادية فى الجهاز الهضمى أو صداع نصفى أو تمثيل غذائى ،، شفتوا بأه إن مش كل ترجيع انتينال

٢٨. القئ الخطير هوا المستمر ، المندفع ، اللى معاه دم ، أو لون أخضر ، ألم بطن شديد، صعوبة بلع ، اللى معاه تغير وعى (اغماء ، توهان ، تشنجات) أو مأثر عالوزن ،، في الحالة دى نوقف الترجيع فوراً بامبول بوصف الزميل الصيدلى لغاية ما نكشف فوراً.

٢٩. الإسهال = محلول جفاف ،، غير كده شكليات

٣٠. الإسهال معناه حمام زيادة في الكمية أو في السيولة ،، معظم حالاته بتبقى نزلات معوية اميبية او ڤيروسية ونادراً بكتيرية ،، المعظم بيتحسن لوحده ،، المشكلة لو طوّل فوق ١٠-١٤ يوم!

٣١. لو الاسهال طوّل فوق ١٤ يوم ،، بيبقى نفكر فى عدم تحمل سكر لاكتوز مؤقت ، طفيل رخم زي جيارديا ،، حساسية قمح مناعية أو تكيس ليفى ، أو أمراض معينة فى الجهاز الهضمى ، لازم مراجعة متخصص !

والمتابعه معاه..!

٣٢. الإمساك مش معناه ان ابنك يطلع مدمن لبوس جلسرين أحاجّه

٣٣. عنده إمساك ؟؟ متأكده انك بتشربي سوايل كويس ؟ وهوا بيرضع كويس ؟؟ زودتى المياه ليه ؟ لو فوق ٦ شهور اديتى أكل ملين ومليان ألياف ؟ لسه؟؟ إديتي ملينات ؟ لسه ؟؟

كده الدكتور هيفحص الشرج كويس عشان الشرخ ،، و

أسباب تانية زى نقص الدرقيه والسيلياك و كسل القولون منزوع الأعصاب نحطها في بالنا

٣٤. لو بنغيّر بسرعه مستحيل نشوف تسلخات.!

٣٥. التسلخات مشكلتها جلد حساس شويتين مع تأخير في تغيير الحفاضة ،أمهات كتير بتغير البراز Stool بسرعه وبتتأخر في البول ، نستخدم عوازل الجلد جلد مليانه زنك ،،كويسين جداً لو الجلد متاكل ،، كريمات للفطريات والكورتيزون بتستخدم تحت اشراف الطبيب ،، اوقات بيبقى تغيير نوع الحفاضة او الحجم الاوسع او "بيبي كيلوت "أفضل ،، لو التسلخات مستمرة ممكن تبقى إكزيما عدم تحمل سكر لبن (لاكتوز) ،، أو صدفيه..!!

٣٦. متديش أنتى بيوتك من نفسك

٣٧. متديش أنتى بيوتك أصلاً

٣٨. مبنديش مضاد كدكاترة إلا بلوازم إعطاء المضاد الموصوفه فى مراجع الطب العالمية .. يعنى كدكاترة لازم نقرا كتير ونطور نفسنا وكآباء وأمهات لازم مناخدش معلوماتنا من منتديات فتكات وأبو نواف للتعارف الجاد !

٣٩. مفاصله بتوجعه ؟؟

عملنا سرعة ترسيب ؟؟ ASOT ؟؟ عاليين ؟؟

مبروك ،، كل ده لوحده مالوش لازمه في التشخيص وللأسف كنا بتدّى بنسلين على الفاضى !!

لازم ولا بد وحتماً يكون فيه معايير الطبيب يرجعلها فى تشخيص الحمى الروماتيزمية " modified jones criteria “ .. إنما بالمنظر ده تلات اربع العيال واخدين بنسللين for fun والله !

٤٠. إبنك متأخر في القعود او المشي او الحركة بشكل عام ؟؟ الدكتور ادى كالسيوم وڤيتامين د بجرعات عالية ومجابش نتيجة ؟؟

ناخد بالنا ممكن يكون السبب ضمور في المخ أو الأعصاب أو العضلات ،، مش كل حاجة كالسيوم

٤١. متدّيش كالسيوم .

٤٢. متدّيش كالسيوم إلا لو في نقص موثق بالتحاليل أو أعراض نقص الكالسيوم بوصف الطبيب ، أى نعم معظم مركبات الكالسيوم اللى في الصيدليات جرعاتها مش مؤذية ، لكن لو بدون لزوم ، مالهاش فايدة !

٤٣. ابنك اللى كل شوية يتخبط في دماغه او يقع عليها متقلقيش الا لو #تغير_الوعى(اغماء-عياط هستيرى-نوم مستمر) أو #رجّع_باندفاع أو #اتشنّج ،، غير كده تابعيه ٢٤ ساعه لو حصل أى حاجة من دول ، كشف طوارئ و الدكتور ممكن يحتاج آشعة مقطعية حسب الحالة

٤٤. التهاب الحلق بيتكررّ ؟؟

اديتى المضاد المضبوط ، بجرعات مضبوطه ، لمدة مضبوطه بوصف الطبيب ؟

لسة بيتكرر ؟؟

لسه؟

اتأكدتى انه مش عنده حساسية أنف والافرازات بتنزل على الحلق "تلهبه" كل شوية؟؟

عالجتيها ؟

لسه بيتكررّ ،،؟

فكرنا فى متلازمة التهاب الحلق المتكرر PFAPA ( فى التعليقات ) ؟

ساعتها نشيل اللوز ب#شروط عند الدكتور ..!

٤٥. #روشتة_عامة_لتقوية_المناعه:

*كل التطعيمات + الإضافية لو نقدر .

* فيتامين دال والحديد زى ما قلنا في الأول .

* كوب موز باللبن صباحاً.

* نوم جيد متوازن وإيقاف السهر تماماً.

* ألعاب كالسباحة والجرى .

*فاكهة وخضار وتقليل أكل خارجى و مواد حافظة وسكريات .

٤٦. ابنك اللى حوالين الخمس سنين ده ولسه "بيعمل على نفسه ميّه" بالليل ،احتويه ، منشربش مياه قبل ما ننام وندخل الحمام بعدها بساعتين ، وندى جوايز يوم ما يمسك نفسه ، واياكى تلوميه ،، هوبّ دابل كيك كل ده ميجيبش نتيجة ساعتها فحص كويس من دكتور طالما عدى خمس سنين !!

٤٧. التشنج الحرارى متقلقيش منه خالص طالما أقل من ١٥ دقيقة ،، في الجسم كله(مش ناحيه واحده) ،، مش بيتكرر فى نفس اليوم ، والعمر من ٩ شهور لخمس سنين ،، ومش بعديه تغير وعى ( نوم مستمر فوق الساعه أو توهان ) أو ضعف فى الجسم .

مطلوب من حضرتك تنزلى الطفل على الأرض وتسيبيه ،، "هيفُكّ" لوحده ..!

وطبعاً تكشفى ..!

٤٨.لزملائى الصيادلة :

كل الاحترام والتقدير لكل صيدلي شاطر ،، بيراجع الروشته صح حتى لو ضغط شغل ،مش بيوقف في الصيدلية الا دكتور صيدلي ،، بيرجع للدكتور لو مش عارف يقرا الخط ، مش بيصرف دوا الا لو متأكد منه ،، بيوفّر البدايل المظبوطه ،، مش بيشكك العيان في الدوا بدون علم ،، بيراجع الجرعات مع الطبيب بعلم ،، واثق في نفسه وفاهم شغله ،، مش بيقول كلام في الهوا زى المضاد تقيل ، الدوا كتير ، الدكتور صغير مش كبير

شكراً للصيادلة الممتازين والله قابلت منهم كتير وبحب اتعامل معاهم جداً

٤٩. لزمايلي الدكاترة :

مفيش حاجة اسمها مطهر حلق ، او مضاد حيوى خفيف عشان التهاب حلق خفيف ، مفيش ربطة للسرة عند المولود، مفيش حاجه اسمها مضاد ينشّف البلغم بدون معايير استخدام ، مفيش حاجة اسمها مضاد حيوى لعلاج الحساسية ، مفيش حاجه اسمها ابنك عنده حساسية لبن من غير ما تبقى بتعرف تشخصها صح ١٠٠٪ وتعالجها صح ١٠٠٪ ، مفيش تحاليل دقيقة ١٠٠٪ لحساسية اللبن إلا المنع والإدخال وبشروطهم ( فى التعليقات ) ،،

مفيش حاجة اسمها "نكحت" الصديد ولا "نشقّ" السِنّه عشان تطلع ، مفيش حاجه اسمها "لنضه نيون" للصفرا الوليدية ، ولا نوقف لبن الأم عشان البيبي عنده صفرا الا ف حالات نادرة جداً ،، مفيش حاجة اسمها منتجات ألبان (زبادى وجبن )بعد السنة خلاص العالم كله بيتكلم على من ٤-٦ شهور اللبن نفسه البقرى لسه بعد السنة ، مفيش حاجة اسمها فاتح شهية قبل ما ادور على سبب الأول ، ولا طفل زنّان من غير سبب ، مفيش حاجه اسمها تغلط في الدكتور اللي قبلك ، قول مختلف معاه ومتقولش مبيفهمش ، احفظ احترامه يتحفظ ليك احترامك ،، لو روشته كويسه متغيرهاش وقول للأهل يصبروا مش لازم تحط التاتش بتاعك ،،

حوّل الحالة اللى مش عارفها انتا مش مستر إكس!

لو جالك تشخيص جديد مش عارفه متسفّهش منه يمكن انتا مش Updated

تواصل مع الدكاتره في التخصصات المختلفة واعرف الجديد وتابع حالتك للآخر ،،

صدقنى ،، هتستفيد وهتفيد العيان وأهله هيحترموك و يدعولك ،،

اعرف ان كل كلمة منّك بتتسجّل عند ربنا ، وهتتحاسب عليها فاتق الله في العيان وخاف عليه زى ابنك او بنتك ..

٥٠. للأمهات :

مامى معانا ولسه متعرفيش ان الطفل بيتابع الحاجات بعينه عالشهر التانى ، بيضحك و بيثبت راسه على الثالث ، بيزق الأرض برجله عالخامس،، بيتقلب عالسادس ، بيقعد تماماً لوحده من غير تسنيد عالتاسع ،، بيقول كلمة او اتنين على السنة الأولى؟؟

بيتأثر منك بالكلمة والهمسه واللمسه ،،

بيلقط منك الحنية زى ما بيلقط العصبية ..

كلامك معاه واهتمامك بيه وبعده عن ال TV بيقلل من المشاكل النفسية بعدين ..

بيفرح لفرحك وبيحزن لحزنك وبيتعب لتعبك ليه ،،

ربنا بيدخلك الجنة بحسن تربيتك ليه ..

و بيدعيلك ولدٌ صالح يدعو ليه ..

وبيتأثر لما يلاقى

بيت العيلة الحب ماليه..!

د.احمد الخطيب