كيف تعفي زوجك - relieve your husband

نصيحة مني عفي زوجك

لان عفة الزوج مش معاشرة وبس ، كل راجل احتياجاته مختلفه عن التاني

اساس الزواج انك تعفي زوجك ..

دي وظيفتك من يوم ما اتجوزتي ..

انتي كزوجة مطلوب منك تعفي زوجك بحسابات زوجك ، بحساباته هو ، مش بحساباتك انتي !

لو زوجك يتعف بالمغازلة .. عفيه بالمغازلة

لو زوجك يتعف بالأكل ، نوعيله في اكله

لو زوجك يتعف بالنظافة ، خلي بيتك علي سنجة عشرة

لو زوجك يتعف بالمنظر ، لبس وصبغه وكوافير وجيم ، عفيه بده

لو زوجك يتعف بانه عايز حد يتكلم معاه

اتكلمي معاه بعيد عن الواد والبت والطبيخ فضي نفسك ليه واتكلمي معاه بدل ما يدور علي اللي تتمني تفضاله ...

لو زوجك رومانسي خليكي رومانسية ، عملي خليكي عملية ، اجتماعي خليكي اجتماعية

هتقوليلي ودوره هو ايه ؟ هقولك ليه دور والف دور كمان ، بس احنا في بلد بتفرم الرجاله ، ماتكونيش مفرمه معاهم ، دي نقطه

النقطه التانيه : كل ست تقدر تخلي جوزها يجي زي الحمل الوديع يشرب من ايدها ..

الدفه في ايدك انتي ...

دايما تلاقي واحده تشتكي من انها عاملة لزوجها كل حاجه ومش عاجبه ، لا هو مش عاجبه ، هو حساباته غيرك ومش هيطمر فيه لانه مش عايز ده .. الموضوع بسيط ..

هو اصلا مش عايز كل ده يكون علي حسابه ، هو عايز يجي يلاقيكي صاحيه تحكي معاه شوية حتي لو قصرتي في الباقي هو عايز كده

غيره عايز يجي يلاقي العيال مصحصحين وقاعدينله ..

غيره عايز يرجع يلاقي شموع وورود ..

غيره عايز يرجع يلاقكي علي سنجه عشره .. المهم هو عايز ايه مش انتي فاضيه لإيه

وهتتسألي عن ده ، عن عفه زوجك ، لانك انتي مسؤلة عنها واعرفي انك لما بتعفي زوجك بتعفي مجتمع بحاله لان ساعتها جوزك مش هيبقي زي المسوخ اللي في الشارع دول ..

تاني بقولك : عفي زوجك بحساباته هو ، لا حساباتك ولا حسابات اهلك ..

ومتروحيش تشتكي لصاحبتك ..

لأ صاحبتك بتعف زوجها بحسابات زوجها واللي هي مختلفة عن حسابات زوجك فمش هتفيدك بحاجة

انتي كده عملتي اللي عليكي معاه وتمام وعلامات ان ده تمام انك تلاقيه مايبصش بره .. هو عامل زي واحد شبعان قعديه علي سفرة مش هيبص لحد لانه شبعان حتي لو مقالش بس هو شبعان ..

وخلاصه القول ....

ماتحكيش لحد علي مشاكلك ، الحسابات مختلفة من بيت لبيت وممكن يتهد بيتك مش يتعمر وهما ميقصدوش

ماتحكيش لانك كمان وانتي بتحكي تتصابي بعين في حاجه بتعمليها وغيرك مش عارفة تعملها

حافظي علي بيتك .. والله الطلاق ده حاجة بشعة و 90% من اللي إتطلقوا ندموا وان لم يعترفوا بذلك

إنتي لو قعدتي اتكلمتي مع زوحك وفهمتوا بعض .. 80% من مشاكلكم هتتحل .. لا دي مش هتحصل من أصله.

وانت كمان عف زوجتك ... عفها بالستر .. عفها بعدم الاهانة .. عفها بالمعاملة الطيبة .. عفها بحنانك واحتوائك لها .. عفها بانك متبصش لغيرها .. عفها بانك تكون سندها .. عفها بالأمان .. عفها بكلمة حلوة تهون عليها تعب اليوم والاولاد .. عفها بانك متقلش منها قدام اهلك .. عفها بانك متقولش عيوبها وتتريق عليها

ليك دور زى ما هي ليها دور

ربنا يبارك في بيوت المسلمين وينزل عليها الراحة والسكينة والمودة والرحمة