طفلي يكره اخوه كيف اتعامل

طفلي يكره اخوه كيف اتعامل - brother's Fighting

ابني بيكره أخوه

في عَرَض مهم بيبين احاسيس سلبية كبيرة بين الاخوات أو أنهم ماتعلموش يحبوا بعض بجد،، لكن قبل ما نقف عليها هشرح لكم موقف متكرر بين ولادي.

ييجي أخ يحكي أن اخوه بيعمل كذا وكذا وكذا ( أشياء سيئة وغلط احيانا أو عبيطة وتافههة غالبا)

فأسمع منه وأسأله: انت بتحب اخوك صح؟؟

يستغرب من السؤال!! ما علاقة هذا بالحب؟؟ .

فأكرر بتحب اخوك؟

يقول نعم . ( لكنه احيانا يقولها حياءا. لأنه منطقيا بحالة الغضب بيكون مشاعر الكره هي المتحكمة..)

أقول له : روح اتكلم مع اخوك مباشرة ونبهه على خطأة بتلات أشكل مختلفة،

لو متوقفش بعد الاولى، شوف التانية لو متوقفش بعد التانية شوف التالتة . قبل ما تيجي تحكيلي هو عمل ايه.

بالأول الأمر كان بياخد وقت بالتطبيق ومرات ينجح ومرات لا.

لكن مع التكرار اتعلموا مفهوم وطريقة مهمة ودليل من دلالة تكوين الحب بينهم كإخوات.. إن اللي يغلط أخوه يتكلم معاه هو مباشرة وينبهه لأنه (بيحبه في المقام الأول) وميقولش لأي حد ولا حتى اخوهم التالت أو بابا وماما.

و الموقف كان بيتحل الحمد لله مع الوقت.. ولاحظت أن الشكاوي بتقل جدا والرابطة بينهم بتزيد ..

وفهموا دلالة قوية من دلالات الحب وهي أن الأخ اللي يتكلم عن اخوه بالسوء يبقى بيشوه صورته وعايزه يتعاقب وبيكبر الحقد جوه قلبه من ناحية اخوه ،، والحقد بيبادله حقد..

علموا الولاد قبل ما يتكلموا على بعض يتكلموا مع بعض،،

وان من صفات المنافقين إذا تحدثوا كذبوا وإذا اؤتمنوا خانوا وإذا وعدوا اخلفوا واذا خاصموا فجروا.

والفجور في الخصومة معناها انه لما يزعل من اخوه بدل ما يتكلم معاه هو ويصفي مشكلته معاه يروح يشوه صورته مع طرف تالت ودي من أعراض الكراهية والحقد وليس الحب الحقيقي.

وخلاصة مهمة لينا كمربيين

معرفة القيم غير التدريب على تطبيق القيم. وميدان الفعل غير ميدان الكلام . الناس ممكن تتكلم عن الحب لكن ماتعلمتش تعيش الحب وتكبره مع اللي حواليها وتطبق مهاراته...

دعاء سامي