تفريز وتخزين الثوم لفترة طويلة - Garlic
 |
| تفريز وتخزين الثوم لفترة طويلة - Garlic |
كل سنة وحضراتكم طيبين انتصف شهر شعبان، ورمضان أصبح على الأبواب‼️
اللهم بلغنا رمضان آمنين مطمئنين وسائر بلاد المسلمين
ستات كتير قبل رمضان بفترة بتحب تجمد بعض أنواع المأكولاتكنوع من توفير الوقت والجهد في رمضان‼️
والثوم طبعا من أشهر #الأطعمة اللي الكل بيجمدها سواء علشان رمضان، أو في #مواسم رخص سعرها، علشان يقدروا يحتفظوا منها بكميات كبيرة يستعملوها لما سعرها يزيد‼️
الثوم طعام غني بالإنزيمات و #الفيتامينات المفيدة جدا للصحة، لكن ساعات واحنا بنستعمله بنلاحظ عليه بعض المظاهر اللي مش بنفهمها، ولا بنفهم هل لما تحصل يبقى الثوم كده #صالح_للإستعمال وللا فسد ولازم نرميه وللا إيه الحكاية بالظبط‼️
هنستعرض مع بعض أهم #المظاهر دي، وكمان هنتعرف مع بعض على إمتى الثوم يبقى فسد ولازم يترمي فعلا‼️
تحول الثوم للون الأصفر الغامق‼️
اللون الأصفر الغامق أو اللون الذهبي اللي ممكن يوصل للبني كمان، معناه إن الثوم ببساطة اتأكسد‼️
و تأكسد الثوم مش معناه فساده ولكن معناه إنه فقد كتير من فوايدهالغذائية، وتحول إلى مجرد منكه للطعام ليس إلا، ممكن نستعمله عادي جدا لمجرد الإستفادة بالطعم مش أكتر‼️
تحول الثوم للون الأخضر أو الأزرق المخضر‼️
وده ممكن نلاحظه سواء أثناء فرم الثوم، أو أثناء قليه في الزيت أو السمن، وده برضه نتيجة تفكك بعض الإنزيمات اللي بيحتوي عليها الثوم بفعل الحرارة، سواء الناتجة عن دوران المفرمة أو عن عملية القلي‼️
الإنزيمات هنا ببساطة بتتحول كيماويا لمركبات تانية، مش ضارة ولا حاجة لكن برضه عملية التحول دي بتفقدها كتير من فوايدها، إنما برضه الثوم هنا صالح للاستعمال ومفيش أي مشكلة في أكله، كل الحكاية إنه بيفقد شوية من فوايده لكن مهواش مضر.
طيب امال إمتى نقول الثوم ده باظ ولازم نرميه ومنستعملوش⁉️
لو الثوم ببساطة(عفن)، يعني مثلا لاحظنا إنه بقى لزج وكأن فيه صابون، أو بيطلع رغاوي و #فقاقيع، أو عليه رغوة، أو ريحته أصبحت كريهة غير ريحة الثوم الطبيعية، أو لونه تحول للرمادي أو الأسود، هنا الثوم ده ميصلحش للإستعمال لأنه كده فسد بفعل #نمو_الفطريات و #البكتريا فيه زي أي حاجة ما بتفسد ولو استعملناه هيسبب أضرار حتى لو مظهرتش بشكل فوري، لكنها موجودة
كمان من #النصايح المهمة لتجميد الثوم ولتجميد أي حاجة، إننا نقسمها للكميات اللي هنستعملها فعلا في المرة الواحدة، منجمدوش بكمية كبيرة ونفضل نفكه ونرجع نجمده وهكذا
كمان لو جزء منه مثلا هنستعمله لتتبيل #الأسماك ممكن نستغل ده ونعصر عليه لمون قبل التجميد، ده بيقلل احتمال تأكسده
ممكن كمان نضيفله #الملح قبل التجميد علشان نقلل احتمالات فساده
©️جميع الحقوق محفوظة لدي دكتور كشكول.