إنخفاض الأسعار الفترة القادمة والوقت المثالي لشراء الأجهزة الكهربائية او السيارات في مصر

إنخفاض الأسعار الفترة القادمة والوقت المثالي لشراء الأجهزة الكهربائية او السيارات في مصر - Decrease the pricees in Egypt

نصيحة لكل واحد عاوز يشتري حاجة دلوقتي!

التسعير في مصر للأسف بيمر بـ3 مراحل!

المرحلة الأولى وقت زيادة سعر الدولار بشكل سريع ، الناس بتسعّر (على ما سوف يكون) !! يعني فيه ناس وتجار لما الدولار وصل 70 جنيه كانت بتسعّر على إن الدولار هايوصل 80 و 90 !! وده حصل في يناير وفبراير الماضي!

المرحلة التانية (اللي احنا فيها دلوقتي) وقت انخفاض العملة ، بيبقى فيه حالة من التناحة والصدمة والترقّب وعدم التصديق !! الكل بيفضل ماسك في السعر العالي لحد ما يشوف العملة هاتستقر على ايه !!

وده بيسبب شلل رهيب في السوق ، البائع منتظر العملة تعلى تاني عشان يبيع بالسعر العالي ، والمشتري منتظر الأسعار تنزل زي ما العملة نزلت !!

وده من وجهة نظري ممكن يستمر 3 شهور في حالة استقرار العملة !!

المرحلة التالتة ، لما تمر 3 شهور والعملة مستقرة (على 50 مثلا) ، الأسعار بتنزل مع أول واحد جريء ينزل السعر ويبيع ، والباقي بيكررر وراه !!

طيب ، لو انت عاوز تشتري دلوقتي تعمل ايه ؟ نصيحتي : استنى شوية لحد شهر يونيو مثلا ، لو العملة فضلت في حدود الـ 50 ، يبقى الأسعار كلها هتنزل غصب عن الكل!

طيب لو عاوز تشتري دلوقتي ، وعاوز تعرف السعر العادل كام ؟

شوف الناس كانت بتبيع بكام شهر اكتوبر الماضي ، لما كان الدولار بـ 45 - 50 تقريبا ، ده أقرب سعر للواقع (والله أعلم)

طيب .. نيجي بقا لمربط الفرس ، اللي انا قلته ده رأيي أنا اللي بنصح بيه الناس ، لكن هل أقدر أفرضه على غيري من الأصدقاء اللي طالبين مني أنزل لهم إعلانات ؟؟؟

في الحقيقة لأ !!

لما صديق بيطلب مني أساعده في بيع شقة أو عربية ، بعمل حاجتين اتنين :

1- بدخل على النت أشوف الناس طالبين كام في نفس الحاجة ، لو لقيت السعر قريب منهم ، بعرض الحاجة زي ماهي ، ويمشي عليه اللي بيمشي على الناس !!

طيب هل ممكن الناس كلها تكون مسعّرة غلط ؟؟ طبعا ممكن ، وده اللي بيحصل دلوقتي عشان محدش مصدق ان العملة نزلت واستقرت !!

2- لو شقة بسأل سمسار ، ولو عربية بسأل تجار

أكثر من كدة مش هقدر !!!

طيب الناس بتثق فيك وهتصدق إن ده السعر العادل !

- آسف ، دي غلطتك !!!

أنا قلت مليون مرة على مدار العشر سنين اللي ربنا قدّر فيهم على الحساب ده الانتشار ، انت ليك عندي الآتي :

1- لو بدأت البوست بكلمة : صديق عزيز = ليك عندي إنه الراجل ده مش نصاب ولا كذاب ، بسسس كدة !! انما المعروض لازم تتأكد منه وتسأل وتكشف وتعمل كللل اللي عليك ، انا معنديش حاجة اقدر اعملها اكتر من النظر في النت او سؤال تاجر !!

2- لو بدأت البوست بـ : من الإنبوكس = تعرف إني مش مسؤول عن المحتوى نهائي !!

ورغم كدة ، بسأل كويس جدا ، وبجرب حاجات في نفسي ، وبسأل المحامي بتاعي ، وأقسم بالله بلبس في كمية حاجات لا تتخيلها !!

أنا بيتي عبارة عن مخزن منتجات للغير !! مراتي وعيالي هايسبولي البيت خلاص من كتر ما بجرب فيهم وفي نفسي قبل ما أعرض حاجة !!

السنة اللي فاتت لبست في 160 ألف جنيه عشان أعوض ناس عن نجار رشحته بيفصل موبيليا ، ولولا ورايا أخوة أفاضل في ظهري كان زماني اتخرب بيتي !!

دكتور صيدلي قال لي إنه عمل تركيبة بتطلع الشعر ، قلتله هجرب في صلعتي الأول ، أقسم بالله قعدت أسبوع بعدها مش عارف أفتح عيني !! حرقان ودموع وبهدلة ، قلتله يا دكتور أنا هفقد البصر !! قال لي : ماهو التركيبة فيها شطة !!!!

جزء كبير جدا من يومي في تحكيم وحل مشاكل ، وياما جربت حاجات زي الزفت وكلها دفعت تمنها وخسرت فلوسها !! وكل ده من غير ماخد ولا مليم ، بالعكس ، بصرف على الحاجة عشان أساعد الناس !!

ورغم كلللل ده ، كللل المشاكل دي لا تتعدى 15% من حجم الخير اللي بيحصل !!

عشر سنين عملت فيهم عشرات الالاف من الاعلانات ، بيع شقق وعربيات ووظائف ودعاية لمنتجات ومشاريع صغيرة وكبيرة ، ربنا جعلها سبب في فتح بيوت ناس ، وتفريج كربات ناس ، وفك ضيقة ناس متورطة في بضاعة ، وشغل ووظائف وسفر وخير كتير جدا جدا جدا بفضل الله تعالى وحده !!

هل طبيعي أوقف 85% من الخير عشان 15% مشاكل ؟؟؟

فيه عاقل يقول كدة ؟

كل ده وانا بستحمل كم تعليقات سخيفة ملهاش أول من آخر !!

سوء ظن ، وقلة أدب ، وجهل وهبد وفتي وحقد وغل رهيب !!

نفوس زي الجحيم !!

في الأول كتب بتعصب وبرد ، وبعدين بقيت أعمل بلوك وأرتاح عشان أعرف أكمل !!

لكن بمنتهى الأمانة ، فيه كمية شر وغل وحقد وجهل في الناس مش طبيعية !!

انا فاكر موقفين - مش عاوز احكي عن الباقي

شقة في مصر الجديدة كانت بـ 6 مليون ، البوست ده اتعمل عليه 2300 تعليق !! تخيل ؟! كلهم سف وجل قلة أدب واتهامات وقرف !!

تصدقوا بالله ؟

الشقة اتباعت بنفس السعر بعدها بيومين !! والمشتري اتصل بي من أمريكا وقال : انا حاطط عيني على العمارة دي بقالي سنين ، وحاولت اشتري فيها شقة بس كانت بتاعت ورثة !! انا عارف العمارة دي كويس والسعر ده حقيقي ، أرجوك احجزهالي لحد ماجي !!

وبالفعل رجع من السفر ، واشترطوا إني أحضر كتابة العقد ، وروحنا كلنا كباب وكفتة وطرب وريش بعدها عشان نحتفل !!

الموقف التاني بتاع صديق كان مستورد سماعة من الصين ، حاجة بريميوم زي بتاعة الأيفون ، وكان سعرها ساعتها 1500 ج

برضه ، شوفت كمية جهل وحقد وهبد في التعليقات رهيبة ، بعدها ربنا أكرمه وتجار كبار خدوها منه ، وبقا معتمد في نون وأمازون !!

والله أنا لو فاضي وعقلي صغير كنت جمعت كل البوستات اللي الناس هرونا جهل وتخلف وحقد واتهامات ، وفي الاخر انتهت نهاية أفضل مما كنا نتخيل !!

في النهاية : أنا ارتضيت إني أشتغل عند ربنا ، ومستحمل كل المرمطة والسخافة والاتهامات دي ، وربنا الحمد لله بيكرمني وبيعوضني

عشر سنين عملت فيهم عشرات الالاف من الاعلانات ، اقسم بالله ما أخدت ولا مليم ، بالعكس بصرف من جيبي !

عشر سنين ماخدتش فلوس غير 3 مرات بالعدد!! والتلات مرات كانوا من أصدقاء شغالين في التطوير العقاري ، وحلفوا عليا أخد فلوس بعد البيعة زي ما بيدوا لمكاتب العقارات .. بس !! والحمد لله على كل حال

طيب هل فيه ناس بتستغلني ؟؟ اكيد طبعا ، والحمد لله الواحد بيتعلم مع الوقت ، وبطلت أعمل أي اعلان لحد غريب غير بعد اجراءات استوثاق كتيرة جدا ، لكن للأسف دي طبيعة شعب ، وطبيعة سوق !!

وفي ناس بتخش تشوف السعر على النت كام وتطلب زيه !

الكل بيضرب في العالي عشان الفصال ، والمشتري للأسف بيبخس الحاجة عشان ياخدها برخص التراب ! أنا مش هقدر أغير في طبيعة الشعب ، ومش هقدر أعمل اكتر من النظر في النت وسؤال بعض التجار !! ومش هقدر أغير في طبيعة سوق مجنون محدش عارف فيه السعر العادل كام ؟!

وفي النهاية ، أرجوا من أي واحد اتعصبت عليه في التعليقات (يغير وجه حق) يسامحني!

وأرجوا من كل واحد مش فاهم في التسعير ولا في السوق يتقي الله ويسكت بدل ما يخش يهبد ويقطع على بيعة أخوه !! زي امبارح واحد حاطط لي سكرين شوت على سعر عربية وبيقول لي اتقي الله ده كدة ضحك على الناس !! طلعت السكرين شوت من شهر يوليو 2023 !!!!!

ربنا يصلح أحوالنا ، ويستعملنا ولا يستبدلنا ، ويجعلنا مفاتيح للخير ومغاليق للشر ، ويجعل العمل كله خالص لوجهه الكريم

عماد الشريف