التصرف الصحيح لو طفلك تعرض للتحرش - Harassment
 |
| التصرف الصحيح لو تعرض طفلك لتحرش - Harassment |
(1) امبارح ابني ١٢ سنه بيقولي وهو بيعيط ياماما من ٣ سنين ابن جارنا كان بيمسكني من عضوي الذكري بس من فوق الهدوم (كان ابني ٩سنين والتاني ١٥) وخايف يكون ربنا زعلان مني وفي كل صلاه بدعي يارب اموت ومش عارف ربنا مش بيستحيب ليه وكل اما افتكر اقعد اعيط.. اتعامل معاه ازاي ولا اقوله ايه؟
ج / حضرتك عملتي إيه معاه لما قال لك كده؟
................
(2) اخدته في حضني وهديته وقولتله انت بتصلي وبتحب ربنا وهو كمان بيحبك ومش زعلان منك لانك مكنتش تعرف ان دا غلط.. استغفر دايما وانسي الموضوع ولما تفتكر قوم غير مكانك واشغل نفسك بحاجه مفيده او تعالي نتكلم اناوانت.
ج / ممتاز.
هو مبدئيا فيه حاجات مفروض تعرفيها بالنسبة للموضوع ده .
الطفل بقاله ثلاث سنوات يحمل هذا السر لإنه حاسس إنه لو تكلم هيظهر للناس إنه سيء ومعيب.
أهم مشكلة عند الطفل حاليا إنه عايز يتخلص من شعور إنه معيب.
فاللي حضرتك عملتيه ممتاز ، ولكن الأمر محتاج أيضا ترسيخ الأمر بإن مايكونش فيه حاجات تانية بتعزز عنده الشعور ده زي مقارنته بأحد أو اللوم المستمر على أخلاقه أو تصرفاته أو لونه أو حركة بيعملها أو حتى حاجة بيلبسها.... لابد من قبوله كليا .
ثانيا: الأمور اللي زي دي المعتدي بيحاول يعملها في شكل لعبة وبيتم إشراك الضحية في القرارات بحيث إنه يظهر إنها مشاركة في اللي حصل وتم بقرار منه ، بل ساعات بيتم تهيئة الطفل إنه استمتع بالأمر لتعزيز شعوره بالخزي والصمت.
الأصل إن الطفل يعرف إنه بريء من كل ده وإنه مكانش يعرف وإنه تم استغلاله وإنه ضحية مش مشارك في الأمر بأي صورة .
[ ثالثا ] طمأنة الطفل يتبعها معرفة ما الذي حدث بتفاصيل أكثر لأنه أحيانا يكون هناك تفاصيل أكثر ، إشعار الطفل بالأمان هو السبيل لإخراجها منه.
رابعا ... دائرة الاعتداء تحتاج لتتبع بمواجهة أهل الطفل الآخر بما فعل لمعرفة من أين تعلم مثل هذه الألعاب ومن فعل معه أمر شبيه.
خامسا...بشكل عام لا يصح ترك مراهق مع طفل لوحدهم .
.................
(3) انا مش عارفه اشكر حضرتك ازاي.. جزاك الله خيرا وبارك لك في اهلك ومالك.. يبقي كام نقطه لو سمحتلي. هل افتح معاه الموضوع تاني لمعرفة تفاصيل اكتر وازاي دا حصل؟ هل يجب عرض الطفل علي طبيب نفسي اطفال؟.. كيفيه التعامل مع اهل المعتدي هل بعتاب وتوبيخ وهل الافضل انا اكلم امه ام جوزي يكلم والده ام مع المعتدي.
ج / أشكرك على تذكيري بتلك النقطة... بالفعل عرض الطفل على طبيب نفسي أطفال أمر مطلوب بشدة .
ويالنسبة لمكاشفة أهل المعتدي فالأمر ليس للتوبيخ أو التصعيد ... الأمر يهدف لتتبع دائرة الاعتداء لتوقيفها وعلاجها بحيث إن المعتدي يتوقف عن الاعتداء على غيره ويتم اكتشاف من علمه هذا الأمر لتتبع دائرة الاعتداء ... الهدف الأساسي هو إيقاف الدائرة.
.................
(4) حاجه كمان يادكتور معلش هو المفروض ابني يعرف اني اتكلمت مع اهل الولد التاني ولا لا؟
ج / مفترض يعرف إن بابا أو ماما خدوا موقف من أجل حمايته وتأكيد حقوقه علشان يثق فيكم ويقدر يكلمكم في أموره بعد كده ، مش خدوا موقف يزود من مأساته أو ينفضح بسببه.
حضرتك هتقيمي الأمر وتشوفي بالنسبة لحالة ابنك هو ماشي في أي اتجاه وتتخذيه ... وربنا بعينك.
د.أحمد عبد اللطيف